早兩日阿史就同史友們講到毛岸英參與抗美援朝期間隱姓埋名，以「劉秘書」之名活躍喺軍中，但好可惜喺一次美軍轟炸壯烈犧牲。面對住呢個咁慘痛嘅消息，當時彭德懷又係點樣報告畀中央軍委聽呢？阿史今次就同大家講一講。
其實喺毛岸英不幸犧牲當日，彭德懷就用咗一個幾鐘寫咗一封百字電報同中央軍委報告呢件事，而呢封電報要去到2020年先至被首次公開，咁到底當中寫咗咩呢？以下就係電報原文：
「我們今日七時已進入防空洞，毛岸英同三個參謀在房子內，十一時，敵機四架經過時他們四人已出來，敵機過後他們四人返回房子內，忽又來敵機四架，投下近百枚燃燒彈，命中房子，當時有二名參謀跑出，毛岸英及高瑞欣未及跑出被燒死，其他無損失。」呢封報告咗毛岸英死訊嘅電報並冇第一時間送到毛澤東手上，反而係被周恩枇攔截，因為佢明白對天下父母而言，白頭人送黑頭人都係難以忍受嘅痛苦，再加上當時毛澤東身體已經染病，所以為咗大局，呢個消息只能被暫時隱瞞。
咁毛澤東又係幾時知道呢個消息呢？就係喺中國人民志願軍第二次戰役中取得勝利，又正值元旦。1951年1月2日，周恩來先將呢封電報交到毛澤東手中。其實毛澤東得知消息果陣已經隻眼通紅，但佢就表示「有戰爭就有犧牲，那麼多中國人民志願軍戰士在朝鮮戰爭中付出了寶貴的生命，不要因為岸英是我的兒子就覺得這是一件天大的事，他和其他戰士一樣，是人民的英雄，死得其所。」