武當七俠係咪真實存在？

無論係喺金庸小說定係其他《倚天屠龍記》嘅影視作品當中，張三丰都係一個相當受歡迎嘅角色。佢嘅清心寡欲、正氣凜然係唔少觀眾深入民心嘅形象，仲有七位大俠徒弟。咁响歷史上，張三丰又有無咁出色嘅徒弟們呢？

講到呢度，有樣嘢先要搞清楚，張三丰係咪真實嘅歷史人物？如果史友好記性，都記得阿史介紹過歷代有關張三丰嘅記載可以話係不盡相同，好似《明史》就話佢係元末明初人，仲話佢破棺復活。仲有講話另有講法話佢元初同劉秉忠同師。另外，明末史學家黃宗羲嘅《王征南墓志銘》，就有載「內家拳蓋起於宋之張三丰。」仲話佢曾被宋徽宗召見。

至於武當七俠，據金庸响《倚天屠龍記》中就話「據舊籍載，張三丰之七名弟子為宋遠橋、俞蓮舟、俞岱岩、張松溪、張翠山、殷利亨、莫聲谷七人。」至於金庸大人引述邊本就無交代。响七子當中，其中以「張四俠」張松溪就最真實，响黃宗羲《王征南墓志銘》及清代《寧波府志》都有佢嘅記載。不過，張松溪係嘉靖年間人，師從孫十三老而唔係張三丰。