早兩日就同史友們介紹完喺抗美援朝戰中創咗唔少驚人紀錄嘅神級狙擊手張桃芳,見到阿史介紹呢位中國狙擊第一人嘅事跡,就有史友想阿史講埋「白色死神」,咁就當然冇問題喇!

喺二戰期間,其實喺蘇聯嘅部隊之間流傳住一個令人聞風喪膽嘅人物,傳聞佢會喺銀白色嘅森林之中無聲無息射出子彈,士兵甚至未搞得清子彈方向就已經失去生命,所以呢個人物又被稱為「白色死神」,佢就係席摩.海赫。

席摩.海赫係二戰最強狙擊手,原本係農民兼獵人嘅佢喺1925年開始服兵役,仲加入埋芬蘭志願民兵白衛隊,喺二戰期間佢就有參與1939年至1940年嘅冬季戰爭,喺呢場戰役入面佢就負責對抗蘇聯紅軍,以SAKO M/28-30步槍同埋KP-31索米衝鋒槍喺98日之內撃殺咗505名至542名敵人,而且佢唔使用任何瞄準鏡,只係單憑槍身上嘅鐵製照門與準星就可以撃殺敵人,係被公認為史上殺敵最多嘅狙擊手。

而喺1940年3月6日,佢就因為臉部中彈重傷昏迷,到佢好返嘅時候冬季戰爭已經結束,喺戰後佢就成為駝鹿獵人與育犬員,享年96歲。

原圖嚟自網絡