早排阿史就同大家介紹過嫦娥五號月球樣品，而近排就有關於呢項樣品嘅首篇研究成果發表，結果真係估你唔到！

呢份研究報告係由中國地質調查局中國地質科學院地質研究所北京離子探針中心劉敦一研究員以及海外高級訪問學者、澳洲科廷大學Alexander Nemchin教授領銜嘅國際研究團隊一同進行。呢份研究就以《嫦娥五號年輕玄武岩的年代與成分》為題，喺國際學術期刊《科學》（Science）上已經進行過線上發表，係以嫦娥五號月球樣品為研究物件發表嘅首篇學術成果。

咁到底呢份研究報告入面講啲咩呢？據研究人員表示，呢次研究就係對嫦娥五號月球玄武岩開展年代學、元素、同位素分析，喺經過數據嘅分折後，就發現月球其實喺19.6億年前仍存在岩漿活動，換言之今次搵到嘅樣本就係比以往29億年更年輕嘅樣本，亦即係將此前已知嘅月球地質壽命延長約10億年。

呢次發現有助解決一個困擾學界好耐嘅問題，就係月球岩漿作用喺幾時停止，而相關嘅月球樣品嘅科學研究工作正在進行，第二批月球樣品發放工作將會繼續開展，真係期待會有更多新發現啊！

原圖嚟自網絡