今日係十月十日,亦係武昌起義嘅紀念大日子。

响一百一十年前,即1911年10月10日,駐守湖北省武昌市嘅湖北新軍發動咗一次兵變,湖廣總督出走,後嚟新軍成立咗中華民國軍政府鄂軍都督府,揭開咗辛亥革命嘅開端。

武昌起義爆發,其實有好多偶然性。响個年四川因民辦鐵路收歸國有而爆發「保路運動」,於署理四川總督端方率部分湖北新軍入川鎮壓。但其實早响武昌起義爆發前,共進會、文學社、同盟會等呢啲革命組織就已經諗住响湖北重鎮武昌策劃一場起事,好似共進會嘅孫武、彭楚藩,同盟會嘅劉復基,文學社嘅蔣翊武、楊宏勝就响武昌有個秘密基地。之但係,孫武於10月9日整炸彈時意外爆炸,事後革命黨人名單落入清官員手中,仲好快捉楊宏勝、彭楚藩同劉復基,斬首示眾。

最後起義軍見形勢危急,本身係駐紮喺武昌湖北新軍嘅共進會成員熊秉坤等人,決定响10月10日起義(原本計劃10月24日),熊秉坤集結隊伍,對天開咗三槍,搶奪軍械庫,各營亦都響應起義,一夜激戰之後,起義軍佔領總督衙門,湖廣總督瑞澂逃走。

第二日早上,起義軍聚集喺湖北諮議局大樓會議廳,討論組建軍政府同推舉都督人選。會上通過,以黎元洪為都督,湯化龍為民政總長,晚上宣布成立中華民國軍政府鄂軍都督府。

武昌起義成功後,南方大部份省份好快宣佈獨立,脫離滿清政府統治。也因為參與辛亥革命嘅先賢烈士,先至令中國由封建帝制走向共和。