中國「東京」係開封？

史友們如果去開旅行，應該都會曾經去過日本嘅東京，之不過其實中國唔止得北京同南京，原來仲有「東京」架！到底呢個「東京」位於咩地方呢？阿史今次就同大家介紹下啦！

東南西北四大「京」，大家對北京同南京都相當熟悉，今次阿史就同大家講一講曾被稱為「東京」嘅開封啦！開封以前真係直接叫做「東京」，只係後來改咗名大家慢慢忘記，而呢個擁有四千幾年建城史同埋建都市嘅城名，喺歷史上先後就有八個朝代都喺度建都立城，所以開封又有「八朝古都」嘅稱號。

唔講史友們可能都未必知，宋朝時期嘅開封係當時世上第一大城市，由於開封輝煌繁榮，所以去到後來《清明上河圖》都係以呢個城市作為藍本描繪大宋繁榮嘅景象。喺宋朝嘅時期，開封就係被稱為東京城，之不過呢度有個巧妙之處，其實東京並唔具體指一個城市，以往東漢時期洛陽都曾經被稱為東京，咁所以「東京」呢個名都可以理解成係都城嘅象徵。