崇禎皇帝上吊嘅老槐樹 後來被鐵鍊栓足200幾年？

明朝崇禎皇帝因為屢戰屢敗、京城被攻破而最終喺煤山上上吊呢件事,相信唔少史友都應該聽過，而喺崇禎皇帝死後嘅兩百幾年嚟，原來佢上吊嘅果顆老槐樹，後來曾經被鐵鏈栓足兩百幾年，今次阿史就同大家介紹一下啦！

喺太監王承恩陪同下，崇禎皇帝就喺煤山一棵槐樹上吊死，時至今日煤山就已經被稱為景山，而當年嘅槐樹就曾經有段故事可以講一講。喺崇禎皇帝死後，李自成雖然攻佔咗京城，但江山都未坐穩就已經戰敗走到西安。而當時順治皇帝就喺多爾袞擁護下，成為入關後嘅首位皇帝。為咗安定人心，當時多爾袞就派人將崇禎皇帝以皇帝禮儀安葬，並且以一圈鐵鏈圍住老槐樹，並且稱之為「罪槐」。

睇到呢度，相信唔少史友都意識到，無論係安葬崇禎皇帝定還是命名「罪槐」嘅舉動，都係為咗令官員們全部投靠滿清王朝、係為咗得到大明江山而做嘅。呢棵槐樹足足被鐵鍊栓足200幾年，直到八國聯軍侵華期間，先至將鐵鏈當做文物咁拎走，老槐樹先得以鬆綁。