「人嚟，狗頭鍘侍候！」年紀大少少嘅史友，都應該記得二三十年前由金超群演嘅《包青天》，每個單元基本上到臨尾都係以鍘人作結，皇親國戚就用龍頭鍘，貪官就用虎頭鍘，平民百姓就用狗頭鍘。

包公叫「開鍘」就叫到家傳戶曉，不過當中就未必同史實相符。因為响中國古代歷朝，就無出現過鍘刀呢種刑具。講到最近似，可能就係斬首之刑同腰斬之刑，斬首即係斬頭，腰斬就係從腰將受刑者劈開兩截，但行刑都係由劊子手操刀。咁點解包公故事中又會有鍘刀出現呢？呢個就應該同元明小說同戲曲編故仔有關。因為元明清時代以歷史為小說戲曲題材非常流行，仲不時加入一啲「當代」元素。就係咁，慢慢就演變到包公周圍鍘人喇！

原圖：包青天劇照