繼續同史友們介紹世界各地嘅一啲文物發現,唔知史友們有冇曾經幻想過真係可以潛水搵到寶藏呢?而呢件極小機會發生嘅事就喺地中海沿岸小鎮旅遊聖地哈韋亞(Xàbia)發生咗!

據西班牙阿利坎特大學(University of Alicante)公布嘅消息指,本身有兩位遊客就打算去到呢個地方潛水順便清理一下海洋垃圾,但其中一位遊客就突然發現海底有啲微光,結果游近去睇嘅時候就發現咗一枚硬幣。而當佢細心睇到呢枚硬幣嘅時候,就喺表面搵到一個古老嘅圖案,當時佢就深信應該仲會有其他同樣古老嘅硬幣。結果兩個人就下潛到岩石區歷時兩個鐘,最終搵到8杖古老嘅錢幣。

喺海底發現寶藏嘅佢哋並冇據為己有,反而將呢啲文物交咗畀地方當局,並且由嚟自哈韋亞市、阿利坎特大學嘅水下考古學家繼續發掘,最終就搵到53個錢幣、3枚銅釘同埋部分鉛碎片。

咁講咁耐,到底呢批文物係咩嚟呢?據專家進一步分析,呢批錢幣可以追溯到公元364年到408年之間,雖然年代久遠,就錢幣上嘅銘文清晰可辨。呢批錢幣唔少都係羅馬皇帝統治時期嘅錢幣,有嚟自瓦倫提尼安一世(Valentinian I)、瓦倫提尼安二世(Valentinian II)、同埋狄奧多西一世(Theodosius I)等等嘅錢幣。

至於點解呢啲錢幣會喺海底,專家相信可能喺西羅馬帝國衰亡時期,錢幣嘅主人冇辦法喺混亂之下使用同埋保護錢幣,最終就只好將呢啲錢幣先沉入海灣當中,但就冇諗到要成1,500年之後先有人發現到。

原圖嚟自網絡