上次介紹咗電視劇《包青天》啲鍘刀係虛構之後,今次阿史又想講另一樣包大人成日拎出嚟嘅寶物 - 尚方寶劍。不過,呢樣嘢同鍘刀一樣,又係虛構嘅。

阿史講嘅唔係尚方寶劍係虛構,而係包拯呢位宋官獲御賜尚方寶劍先至係虛構。據史籍所載尚方劍起源於漢代,不過只係皇帝嘅配劍,並無皇帝御賜臣下代行皇命嘅功能。至於後世熟悉嘅「尚方寶劍」制度,始於明朝萬曆年間,據《明史》所載,萬曆二十年寧夏叛亂,萬曆帝就御賜咗尚方寶劍俾總督魏學曾同巡撫葉夢熊,授權兩人可以先斬後奏。

至於包青天故事點解會有尚方寶劍出現,咪又係明代啲文人寫戲曲時加入咗「當代」元素,所以就出現咗包青天同啲手下拎住尚方寶劍周圍拋浪頭嘅橋段喇!

照咁講,包龍星拎尚方寶劍嘅可能性,係會大過包拯。

原圖:包青天劇照。九品芝麻官劇照