電影《長津湖》熱爆神州，令唔少人都對抗美援朝呢段歷史有更多認識。之前阿史介紹過當年冒著零下40度伏擊敵軍嘅「冰雕連」，今次就想介紹一位抗美援朝戰爭中犧牲嘅烈士邱少雲。

邱少雲係出身自四川貧農家庭，新中國成立後加入解放軍。1950年，中國人民志願軍開赴朝鮮半島參戰，邱少雲所屬部隊也投入抗美援朝當中。1952年，邱少雲所在連隊接到一項艱巨任務，就係要消滅盤踞朝鮮中部山區平康同金化之間「三九一高地」嘅敵軍，將戰線向南推進。而呢個地區係炮火封鎖區，最後志願軍決定派員潛伏响敵人陣地前沿，潛伏嘅士兵要保持紀律，唔可以移動亦唔可以講嘢，因為任何舉動都會有機會被敵軍發現。結果邱少雲成為500多名嘅伏兵其中一員，插住蒿草做埋伏。點知敵機就响邱少雲埋伏位置附近投咗個燃燒彈，邱少雲全身上衣服開始著火，佢附近嘅士兵都替佢焦急，但又幫唔到佢手，結果佢緊咬牙關兩隻手任憑烈火响身上蔓延，佢就咁被燒咗三十分鐘，响無出過聲情況下犧牲咗。後嚟志願軍成功攻佔三九一高地，英勇犧牲嘅邱少雲响1953年亦獲追授為中國人民志願軍一級英雄。

而佢嘅戰友、親眼睇住邱少雲犧牲嘅李元興，就為佢寫咗《我的戰友邱少雲》，亦成為內地小學語文課課文之一。