長津湖戰役 遲浩田奇招禦寒助減低傷員?

近排因為電影《長津湖》嘅火熱，令到唔少網民都主動去認識返呢段抗美援朝嘅歷史。呢段歷史之所以悲壯，其中一個原因係因為當時戰地面對住幾十年一遇嘅寒冷天氣，而當時我國嘅戰士喺缺少資源嘅情況下仍然奮力戰鬥。唔講唔知，其實當年有個人曾經諗出一招奇招禦寒幫助減低傷員。

阿史所講嘅呢位人物就係遲浩田，喺抗美援朝初時，因為交通線路同埋物資問題，我國嘅戰士就只係得凍嘅薯仔、好薄嘅棉衣抵禦寒冷，而當時美軍就有極其充足嘅禦寒物資、新鮮食物。雖然雙方資源差天共地，但我方仍然未驚過，喺戰事初期就已經戰勝咗美軍王牌「北極熊團」。

之不過，喺天寒地凍嘅環境，我國志願軍就已經有三萬人凍傷，咁到底點算好呢？當時就有一位叫做遲浩田嘅人獨創一種禦寒方法令我軍凍傷嘅人數大大減少。如果大家要禦寒，好直接咁諗就當然係要生個火，之不過長年喺雪地生活嘅遲浩田就諗到要喺雪地利用冰雪搓自己嘅臉部同埋手腳，等自己嘅身體可以適應環境。本身唔少志願軍都半信半疑，但後來發現遲浩田並冇凍傷，最終大家都採用呢個方法，我軍凍傷嘅士兵數目亦都大大減少。