真係嚇咗一跳！據北京朝陽區公安分局公佈，指39歲嘅李某迪因嫖娼而被行政拘留，而《人民日報》就直接帶話題「李雲迪嫖娼被拘」，證實嫖客就係著名鋼琴演奏家李雲迪，平時睇落斯斯文文嘅李雲迪，估唔到會咁樣俾人拉咗。
李雲迪係近呢二十幾年嚟最出名嘅華人年輕音樂家之一，响重慶出生同長大嘅佢，7歲開始學鋼琴，1991年拜但昭義教授為師。憑住天賦同努力年少成名，贏得多個音樂比賽冠軍。响2000年，李雲迪參加第十四屆蕭邦國際鋼琴比賽，而蕭邦國際鋼琴比賽係世界上最著名、級別最高嘅鋼琴比賽之一。雖然當時佢只有18歲，但憑住出色表現最終獲得金獎，亦係呢個比賽有史以來最年輕獲獎者。一戰成名嘅李雲迪成為萬千年輕人嘅印象，包括香港都掀起咗一股李雲迪熱潮。
當時李雲迪之所以响香港受歡迎，除咗鋼琴技術高超外，佢當時留住一把長頭髮，同日劇《悠長假期》飾演年輕鋼琴家嘅木材托哉有幾份相似，不過當年有記者訪問佢時想佢彈《悠長假期》配音被佢拒絕咗，理由係佢係一個古典鋼琴家，唔係偶像。