唔知玩開三國志嘅史友們，有無發現唔少三國遊戲好似無將台灣島放响可控制範圍當中。最近阿史玩返30年前經典DOS遊戲《三國演義》，當中就有成日出現「洪水來了」嘅台灣，咁三國時期台灣島係咪响三國政權範圍內呢？
對於三國時期中原人士到達台灣島，最為人熟悉就係孫權派員出海到達夷州。响《三國志‧吳書二‧吳主傳第二》有載：「二年春正月，魏作合肥新城。詔立都講祭酒，以教學諸子。遣將軍衛溫、諸葛直將甲士萬人浮海求夷洲及亶洲。亶洲在海中，長老傳言秦始皇帝遣方士徐福將童男童女數千人入海，求蓬萊神山及仙藥，止此洲不還。世相承有數萬家，其上人民，時有至會稽貨布，會稽東縣人海行，亦有遭風流移至亶洲者。」
此外，據東吳臨海郡太守沈瑩所著嘅《臨海水土志》（已散佚）所述，夷州位於臨海郡即今日福州東南二千里，土地無雪霜，草木不死，四面是山，眾山夷所居。無論地理位置同島上環境，都同台灣島相似。所以有學者就估計，亶洲即係依家嘅日本，夷洲就係今日嘅台灣島，而呢啲亦被唔少後世人視為中國正史中大陸同台灣通航嘅最早記錄。
不過，亦有人質疑《三國志》提及嘅夷州並非台灣島，而係琉球本島。因為由東吳首都建業一帶出海往東，去到琉球一帶機會比較高，而且經琉球群島同北上到達今日嘅日本，就似乎合理過由台灣島到日本。
唔知史友們又有乜睇法呢？不妨留言討論一下。
原圖：衛溫浮海夷州圖