台島嘅蔡英文接受美國電視台訪問時，證實有美國軍隊响台灣訓練。睇內地網民啲反應，都話美國又再一次軍事介入兩岸事務。用「再一次」嚟形容，咁之前又有邊次同美軍有關呢？

响上世紀四十年代末，國民政府响內戰當中兵敗，最終撤退到台灣。早响1949年3月，新華社已經發表題為《中國人民一定要解放台灣》嘅評論，首次提出「解放台灣」口號。而新中國成立後，解放軍就積極部署解放台灣。

不過，一場戰爭就令「解放台灣」出現咗變化。1950年6月25日，朝鮮半島戰爭爆發。而响1950年6月27日，美國總統杜魯門下令第七艦隊進駐台灣海峽，聲稱為咗「阻止共產黨對台灣的進攻」，因此美國要「協防」台灣，後嚟仲拋出所謂「台灣地位未定論」，作為美國干涉中國內政行動嘅藉口。

其實除咗第七艦隊進駐台灣海峽外，1950年7月杜魯門派藍欽為駐台「公使銜」代辦，海軍少將賈那德為駐台武官。7月31日麥克阿瑟率領美軍代表團訪問台灣，同蔣介石商定，國民黨的一切武裝力量歸麥克阿瑟統一指揮，共同防守台灣。到咗8月4日，美國空軍第13航空隊入駐台灣，建立「台灣前進指揮所」；美海軍亦响台北成立「聯絡部」，負責協調指揮台灣海軍；美國政府仲派出一個「美國遠東軍駐台軍事顧問團」嘅代表團長駐台灣，國民黨軍事指揮權實際上完全控制响美國手中。1954年12月，美國政府同台灣當局簽訂「共同防御條約」，確認咗「互助同盟」嘅協防關係，呢個軍事協防基本架構運作咗25年。响1978年美國因將同中國建交所以廢除咗「共同防御條約」，通知台方「條約」於1980年1月1日終止，並從台灣撤軍。

咁點解美國會咁高調介入台灣事務呢？麥克阿瑟曾經講過台灣係「一艘永不沉沒的航空母艦」，講到尾美國就係為咗遏制共產主義「擴張」，响西太平洋地區封鎖同圍堵中華人民共和國。