考古隊湖北開挖千年古墓 竟然遇到烏龜探頭爬出？

話說今日喺內地就有一宗幾有趣嘅考古新聞，唔知大家又有冇幻想當考古隊進行發掘之時，墓入面竟然有生物爬出嚟，果下大家又會有咩反應呢？

近排有考古隊喺中國湖北襄陽進行考古發掘，呢次發掘嘅地方係一座喺西漢時期嘅古墓，早前就因為大雨而意外被發現，經過清理積水嘅工作之後，考古隊就正式進行發掘。之不過，就喺對呢座距今兩千年嘅古墓進行發掘果陣，考古隊就見到有隻大烏龜迎面探頭而出，當場就嚇親唔少經驗老到嘅成員。

咁到底點解一個密封千年嘅古墓竟然會有生物喺入面，到底呢隻烏龜係點樣生存咁耐？原來呢隻烏龜並唔係咩千年神獸，亦都唔係長生不老，而係因為呢座古墓曾經被盜墓，估計烏龜就係喺盜洞當中走入嚟，所以古墓當中亦都冇有價值嘅文物，事件亦都係虛驚一場。