提起「木偶」呢樣國家級非物質文化遺產，可能唔少史友都會諗起泉州提線木偶、漳州布袋木偶，而近排有「木偶之鄉」之稱嘅揚州就有一項關於揚州杖頭木偶嘅新搞作！

作為木偶三大流派之一嘅揚州杖頭木偶，係由春秋戰國時期嘅俑發展而嚟，始作喪家祭祀之用，直到明清年間先至分成三種表演形式，以唱徽詞配以傳統戲。而近日揚州市木偶研究所就製作出一對純手工巨型木偶，叫得做巨型當然唔係一般大細，單單係個頭部就已經超過一個人嘅高度。據介紹，呢對古代戲劇人物造型嘅木偶分別約重75公斤，一隻就高達4.8米，而另一隻就有4米高，單係高度就已經創下全國木偶製作之最！

如果以為呢對木偶只係得個「高」，咁大家就真係大錯特錯喇！呢對木偶唔係淨係用嚟擺放陳列，而係真係可以郁得到！據揚州市木偶研究所工作人員表示，木偶由鋼結構做「骨骼」，軀幹、四肢採用木頭同埋特殊材料製作，雖然好難製作，但所有身體部位同埋關節都係仿照人體結構，手腳都可以活動自如，就同手指同埋眼睛都可以操控到，真係犀利！

原圖嚟自網絡