近日東京地鐵發生咗單無動機無差別斬人放火事件,造成十幾人受傷,最得人驚係以電影「蝙蝠俠」反派角色小丑打扮嘅行兇者,行兇後坐定定食住煙等被人拉,睇到心都寒埋。

事件發生後,阿史就見到台灣島內媒體就重提2014年台北捷運隨機殺人事件。行兇者叫鄭捷,當時係台灣東海大學二年級生,响2014年5月21日下午,鄭捷就响台北捷運板南線龍山寺站同江子翠站之間嘅列車上行兇,由於事出突然,唔少人响無防避之下就被斬被刺,後嚟鄭捷仲落車走到月台行兇,就响月台被制伏,之後就被警員拘捕。

後嚟响警方偵查期間,鄭捷話自己從小就想殺人,對自己所作所為一啲都唔後悔。最後法院以殺人罪同殺人未遂罪判其死刑,鄭捷亦响2016年5月10日被槍決。