喺唔少影視作品當中，經常都會出現嘅除咗有「尚方寶劍」之外，仲有一樣每逢奸臣即將受死都會拎出嚟嘅寶物，就係「免死金牌」喇！

雖然「免死金牌」喺古代並唔係好似電影當中咁樣，但佢確實喺歷史上曾經存在過，名為「丹書鐵券」。之所以會咁樣叫法，全因為係佢「以鐵為契、以丹書之」。呢樣寶物始於西漢政權初建時，漢高祖劉邦畀殊勳功臣加官進爵封侯嘅憑證文書，最早嘅丹書鐵券並無免罪、免死等特權，係去到南北朝時期先至出現。咁點解「丹書鐵券」又會同金牌扯上關係呢？原來去到隋代起丹書鐵券上丹砂填字就開始改由黃金鑲嵌，聯同免死嘅特權，就被合稱為「免死金牌」。

咁問題嚟喇！既然君要臣死，如果臣拎出個「免死金牌」，又係咪真係唔使死呢？喺歷史上明太祖朱元璋就頒授過97個「丹書鐵券」，但最後大部分人都被朱元璋親手誅殺。聽到呢度可能大家都覺得「丹書鐵券」都冇乜用，之不過亦都有人真係可以「免死」。

唐代唐昭宗曾經頒過「錢王鐵券」畀錢鏐，後來李唐王朝滅亡後，錢鏐據浙江稱王，而呢個「錢王鐵券」就一直保存落嚟畀錢氏後人。去到明洪武二十四年（1391），建昌知府錢用勤因任內稅糧短缺而被都察院查勘抄家。本身貪污稅糧喺當時絕對係會不得好死，但咁岩錢用勤正係錢鏐後人，佢用到「錢王鐵券」至京求見聖上，最後得到赦免仲可以拎返所有田產家財，名乎其實以前朝嘅金牌救咗後來嘅官！

原圖嚟自網絡