早兩日阿史介紹咗初中中史必讀嘅淝水之戰，苻堅點樣响拎住號稱八十萬大軍情況下慘敗。不過教科書當中就應該無提過，其實响苻堅南下伐晉前，就曾經被勸唔好出兵。

之前都講過，前秦嘅苻堅本來係東海王，秦主苻生就想剷除佢，不過就俾苻堅先下手為強仲殺埋苻生自立為大秦天王。做咗皇帝之後，苻堅督促農務，尊崇儒學，努力練兵，仲用武力統一北方，令前秦達到國富兵強。國強就自然令苻堅心雄，於是就決定親率大軍南下伐晉。不過，响佢揮軍南下之前，丞相王猛响臨死前就勸過苻堅，話晉室係正朔相承，應親仁善鄰。佢更點名話鮮卑、羌虜同前秦係仇敵，會成為禍根，應及早消滅。對於王猛呢個睇法，苻堅細佬苻融亦勸苻堅應正視鮮卑同羌人可能有機會造反嘅問題。

之但係，苻堅就無聽佢哋勸告，最終之淝水之戰慘敗，及後羌族作反，羌人姚萇殺死咗苻堅，悲劇收場。所以話，聽下人勸有時係有用。