如果有朝一日大家發現自己住緊果間屋值八億，大家第一件事又會做啲咩呢？呢位名為李世益嘅湖北特困農民就做咗一件好多人都唔會做嘅事，就係無償捐贈畀國家。到底一間點樣嘅屋會價值八億呢？阿史今次就同大家講一講呢個故事！
呢位湖北農民李世益按照當時嘅情況其實係屬於特困戶，生活得相當艱苦貧窮，而佢所居住嘅房屋位置更加因為要發展而被列入拆遷，但亦都因為咁而令佢得到拆遷隊提醒，發現自己呢間自明朝傳落嚟嘅房屋並唔簡單。李世益搵嚟專家鑑定，發現原來成間屋都係以金絲楠木構成，呢種木材由古代開始都已經係富貴嘅象徵，一般只有皇室先可以使用，而今時今日就已經成為國家二級保護植物，市場上仍然受到唔少人追捧。
得知自己住咗幾十年嘅屋竟然係金絲楠木構成，李世益都覺得好驚訝，而呢個消息傳出之後，有唔少文物收藏家都前往聯絡李世益，希望佢可以賣出呢間古宅。李世益幾經掙扎之後，最終都係決定將祖宅捐畀國家，祖宅亦都被國家文物局整體搬遷到恩施林業文化博物館，成為當地一處知名景點。
原圖嚟自網絡