如果要介紹世上最宏偉嘅建築，對阿史嚟講天安門絕對係數一數二嘅一座。喺整體嘅佈局同埋設計嚟講都係充滿匠心，但唔知史友們又有冇諗過，原來設計天安門嘅呢位歷史人物，喺設計之時就只係得十八歲？今次阿史就同大家介紹下啦！
今時今日嘅天安門，其實就即係過去嘅紫禁城宮門，喺設計初時係叫做承天門。呢座「承天門」係由明代御用建築匠師蒯祥所設計，始建於明朝永樂十五年（1417年），直至清朝順治八年（1651年）先至改名為天安門。咁問題嚟喇，點解會冇啦啦興建呢度門呢？
原來喺朱棣掀起「靖難之役」後，由於佢係奪取侄子嘅皇位，所以心入面過唔得唔快活，南方嘅生活亦都唔鍾意。喺力排眾議之下，佢就決定遷都到北平，而其中一項重要嘅工作就係修築皇城。同以往喺長安、洛陽呢啲地方唔同，北平基本上冇乜宮殿遺址，只能從平地起出一座皇家大城。由於呢件係相當龐大嘅工事，並唔係一般工匠可以做到，於是當時朱棣就諗起皇家建築推手、蒯祥。
蒯祥嘅父親蒯富工藝都相當高超，喺修築南京紫禁城工程當中，朱棣就見到蒯富嘅實力，佢當時仲得到「木工首」嘅稱號，蒯富亦都留低唔少出色嘅建築物就好似「朝天宮」、「靈穀寺」等等。
祖傳嘅技術傳到蒯祥手中就更加不得了，朱棣喺決定遷都之時即時係諗到蒯富，但又因為蒯富年老，最終就畀學有所成嘅蒯祥擔任北京紫禁城的總設計師、負責人，而當時佢就只係得十八歲，由皇門施工到完工用咗不足三年時間，真係不得了！

原圖嚟自網絡