如果喺皇后嘅宮殿地底發現到一條秘道，唔知大家會有咩幻想呢？到底係用嚟逃生？定係偷情？近排漢朝未央宮遺址附近嘅一條秘道就引起唔少內地網民、甚至專家嘅討論，阿史今次都同大家講一講啦！
關於漢長安城遺址，相信唔少史友都曾經聽講過，早喺1956年中國社科院考古研究所就已經去到西安對呢個有二千年歷史嘅遺址進行考古發掘，喺1981年就完成咗未央宮前殿北部區域嘅發掘並且發現到一座宮殿遺址。而呢一座並唔係普通嘅宮殿，專家就推測佢係皇后嘅住所「椒房殿」。呢次嘅發現亦都唔止咁簡單，喺發掘完呢個遺址後，專家就喺宮殿後方搵到一條長達20幾公尺、深約1公尺嘅地下通道，通道上仲有鋪設有紋飾嘅地磚，盡頭仲可以去到一間細房。
喺早期嘅夏朝二里頭宮殿遺址，定還是秦代咸陽城遺址都未有類似嘅發現，所以唔少網友一開頭就推測一下就係儲藏室、一下就係用嚟躲避火災、甚至仲有人認為係皇后用嚟偷情。但呢啲講法專家都一一否定，原因係專家認為當時王權與后權勢均力敵，喺西漢時期亦都出現過唔少外戚專權嘅情況，呢條地道最有可能就係皇后用嚟方便外戚離開而設立嘅，真係估佢唔到。
原圖嚟自網絡