上次阿史介紹咗元朗以前有個地方叫雞地，咁啱個日搭車經過屯門又見到有個地方叫虎地，咁呢個地方點解同老虎有關呢？

虎地位於屯門新市鎮嘅東北一帶，以往係一個鄉郊地區，今時今日最多人識就應該係嶺南大學校舍所在地。至於呢個地方之所以叫虎地，其中有講法就同老虎出沒有關。相傳呢個地方以往係有華南虎出沒，而以往香港地區係華南虎活動範圍之內，所以有老虎出沒就一啲都唔奇。而另一個講法就係話呢個地方附近山勢好似成個老虎口咁，所以就叫做老虎坑，所以附近地方就叫虎地。不過呢兩個講法都係口耳相傳，並無一個確實講法。