今日阿史响網上見到唔少討論,就係政府計劃重建香港大球場,仲將座位數目由現時4萬個減到9000個,再加返條跑道。唔少人都覺得大球場一下子無咗成三萬個位好似太誇張,不過足總貝老就話本地賽事觀眾好少超過一萬,話大球場九千個位都合理咁話喎....

香港大球場可以話盛載住一代又一代香港人嘅回憶,香港大球場以前叫政府大球場,1955年啟用,係香港第一個大型綜合運動場。以往呢個球場唔單止係球場,仲係一個有跑道嘅運動場,所以昔日唔少學界運動會都响度舉行,相信唔少人都應該記得個條沙鋪嘅跑道。不過上一代香港人最多回憶就始終係足球比賽,昔日香港球市暢旺,大球場好多時都紅旗高掛,即係啲飛賣晒,甚至有啲人為咗睇波爬上附近山頭。亦因為有咁嘅市況,所以政府就响九十年代將政府大球場重建,就係依家嘅香港大球場。不過,隨住香港球壇市道轉差,大球場掛紅旗爆滿嘅日子就唔算好多次,通常都係外隊嚟表演賽會爆。呀!仲有七人欖球賽。