「美人遲暮 英雄末路」 係指邊啲咩？

尋日就同史友們講到「江郎才盡」嘅故事，而同呢個故事同樣悲哀嘅情況仲有兩個，就係「美人遲暮」以及「英雄末路」喇！今次阿史就同大家講一講啦！

先由「美人遲暮」講起，呢個詞係出自戰國楚國屈原《離騷》當中嘅「惟草木之零落兮，恐美人之遲暮」。就咁睇字面意思，可能大家都會理解到係以草木嘅零落去比喻美人嘅容貌老去而感到哀怨。之不過，其實呢句說話嘅意思並唔係咁簡單，屈原係當時著名嘅愛國詩人，而喺佢寫詩之時正係楚國被其他國家侵佔之時，佢口中嘅美人其實係指緊楚國。

至於「英雄末路」其實就比較容易理解，喺字意上嚟講就係有才華有本領嘅人無路可退。而喺歷史上，講到數一數二嘅英雄自然就係西楚霸王項羽，當時佢百戰功成、滅秦興楚，從來都冇人諗過佢會被漢軍重重包圍。喺兵敗如山倒之下，佢因為愧對江東父老而喺烏江自刎而死。