以往阿史都同大家介紹唔少我國嘅考古發現，搵到金、銀、玉器並唔係啲咩新奇嘅事，喺唔少墓葬當中都會有相關嘅發現。之不過，有一個寶藏誇張到被稱為「亞洲第一寶藏」，唔知史友們又聽過未呢？
阿史所講嘅呢個寶藏，正正就係被稱為「中國五大寶藏之謎」嘅張獻忠寶藏。根據《明史》記載，「獻忠黃面長身虎頷，人號黃虎。性狡譎」，而喺崇禎三年，佢就因為隨王嘉胤，作戰勇敢，身先士卒，累功進至「西營八大王」之一。後來，佢更加同李自成攻陷鳳陽，轉戰兩湖，盤踞巴蜀，甚至仲攻破成都攫取蜀王名下數以千萬白銀，喺呢段期間聚斂咗大量財富。
之不過，喺距今三百幾年前，張獻忠率領十余萬大軍將金銀財寶裝載於數千艘船上打算東下之時，就被縱火攻船燒沉其舟，張獻忠寶藏就係咁樣悉沉水底。喺未有考古發現之前，四川一帶就只係流傳張獻忠沉銀價值「石牛對石鼓，金銀萬萬五。誰人識得破，買盡成都府。」
咁到底呢個又係咪一個傳說呢？時間去到2017年4月14日，有考古團隊就對張獻忠沉銀遺址進行發掘，將呢個400幾年嘅傳說逐步印證。考古團隊就搵到超過三萬件文物，當中大部份都係金銀器，而且當中唔少都係珍貴文物就好似有虎鈕「永昌大元帥」金印、「都水司正銀」一百兩銀錠、冊封金冊等，仲有好多都係同張獻忠大西政權直接相關嘅文物。
之不過，據記載張獻忠寶藏數量相當龐大，出土文物不足百份之一，到底呢個「亞洲第一寶藏」仲有啲咩呢？就仲要需要進一步嘅考古發掘先知喇！
原圖嚟自網絡