由於基建工程頻密,特別係喺興建鐵路嘅時候都係需要開山闢地,所以經常都會有唔少有趣嘅考古發現。近日喺英國嘅一個高鐵工地,就出土咗三尊完整嘅古羅馬時代男女半身雕像,阿史今次就同大家介紹下啦!
近排喺英國2號高速鐵路項目(HS2)其中一個施工地點,英格蘭白金漢郡斯托克‧曼德維爾嘅聖瑪麗教堂遺址中,考古發掘嘅工程就進入尾聲。呢個遺址原身係一座教堂,建於公元1080年諾曼人征服英格蘭時代,工程早喺2018年開展,過程中就搵到超過3,000具人類遺骸同埋中世紀石刻,當中甚至仲有日晷或巫術符號。
而喺考古工程繼續進行嘅時候,考古人員就喺一條圓形嘅溝渠搵到一座可追溯至公元5世紀至諾曼人征服前嘅盎格魯-撒克遜時代塔嘅地基,而當中就出土咗3尊具古羅馬風格嘅石雕,其中兩尊更加係一對成年男女。之不過,古羅馬雕像一般有鮮艷顏色,而今次發現嘅雕像並冇呢個特點,到底當中有冇色素沉澱,就需要考古學家進一步研究喇!
原圖嚟自網絡