戰國時期有水晶杯？

水晶杯今時今日已經成為唔少人品酒時必備嘅高級餐飲用品，呢樣喺玻璃之中加入礦物質而製成嘅用品大家都會覺得係現代嘅產物，但大家又有冇諗過喺戰國時期就已經有水晶杯呢？

喺1990年浙江省杭州市半山鎮石橋鄉就有一座戰國土墩墓被發現，當中就出土咗唔少珍貴嘅文物，而其中一樣就真係諗都冇諗過！考古人員喺古墓當中就搵到一個佈滿泥土嘅反光嘅物體，當佢清理咗表面嘅泥土之後，一個杯嘅輪廓就出咗嚟。之不過，當時呢位考古人員即時就有個懷疑，就係明明係一座二千幾年嘅古墓，點解入面會有個現代嘅玻璃杯呢？係咪古墓曾經被盜墓賊幫襯過呢？

帶住呢啲疑問，考古人員就進行過一系列嘅化驗，由表層到內部嘅泥土、再到杯嘅質地都一一化驗，最終就確定呢個杯係屬於一個戰國時期駐守杭州嘅重要人物，雖然睇落真係好似「玻璃」，但呢個杯其實係由一塊透明度極高水晶雕琢而成。當中就用到唔少鑽孔、圓雕、弧面打磨等技術，當時嚟講都已經係巧奪天工，難怪會成為杭州博物館鎮館之寶！