呢排恆安地鐵站就以「心繫社區」為題，舉行咗一個書法作品展覽。書法展覽理應就係畀大家欣賞下唔同人嘅書法作品，感受當中嘅文化氣息，之不過近排就有一幅作品引起唔少網民熱議，甚至仲有網民話呢個字好似粗口喎！咁到底呢個係咩字呢？阿史今次就同大家講一講啦！
其實大家都會知道，呢隻字係正正經經嘅書法字，但大家就未必會估到其實呢隻係隻「虎」字。喺古代，呢隻「虎」字就有唔少寫法，就好似有將「虎」字嘅「虍」及「几」兩個部份作筆順及筆劃簡化，先寫「虍」，之後再將「几」變成「巾」字等等。而恆安站呢幅作品嘅寫法就係明代書法家徐渭嘅草書「虎」字寫法，亦係後來流傳嘅「一筆草書虎」。如果史友睇落都仲係覺得似係粗口，咁就妨可以去睇下徐渭草書《論書法卷》，係佢喺晚年嘅力作，好值得欣賞！
原圖嚟自網絡