潮州無潮州辣椒油？

相信史友們去食潮式粉麵時，好多時都會加辣椒油，潮州辣椒油可以話係唔少香港人嘅飛佛，但可能大家唔知，香港人平時食慣嘅潮州辣椒油，其實唔係來自潮州。

講到潮州辣椒油來自潮州，最多人講就應該係話潮州辣椒油係潮菜醬碟之一，即食潮菜時伴碟嘅調味醬料，仲有人話引唐代大文豪韓愈流放潮州時寫咗《初南食貽元十八協律》呢首詩做佐證：「我來御魑魅，自宣味南烹。調以鹹與酸，與椒與橙。」呢個「椒」就話應該係辣椒，可能係潮州辣椒油或前身咁話。

不過，有飲食專家考證，現時流行嘅潮菜醬碟，唔少都唔係傳統嘢，應該只有魚露、普寧豆醬係歷史較長，其他都係後嚟引入潮菜當中，辣椒油就係其中一種。的確，潮州菜根本唔著重辣味。