日語、韓語相信唔少史友睇劇嘅時候都會經常聽到、甚至仲有部份史友直頭去上堂學埋呢啲語言。之不過，唔知史友們喺學習呢兩種語言嘅時候，又覺唔覺得佢哋相似呢？而今日呢個謎解可能真係解得開喇！
根據《自然》期刊發布嘅一項有關綜合語言、基因同埋考古學證據的嘅研究發現，由現代日語、韓語、土耳其語以及蒙古語等同一語系嘅語言同埋講呢啲語言嘅人，都係起源於大約9,000年前生活喺中國東北地區嘅古代農民！呢個消息真係震驚唔少人，可能呢幾個地方嘅人諗都冇諗過！
今次呢份研究係由來自英國、中國、捷克、法國、德國、日本、新西蘭、韓國、俄羅斯、荷蘭同埋美國研究人員聯合公佈，佢哋對泛歐亞語系5個群體（日本人、朝鮮人、蒙古人、通古斯人、突厥人）進行起源同埋共同程度嘅研究，最終研究出「已經顯示出可靠核心證據」證實佢哋係源自一個共同祖先。咁當中到底有咩證據呢？
除咗有中國、日本、朝鮮半島、羅斯遠東地區255個考古遺址數據，最重要一個就係代表著泛歐亞語系98種語言、250種詞彙概念數據組顯示，呢個語系都係可以追溯到西遼河流域嘅種植穀子農民。而後來隨住農民遷移到東北亞，呢啲後代語言就得以發展成今時今日咁多種！
原圖嚟自網絡