歷史上，唔少帝王喺取得王位之後，為咗可以確保江山永固，經常都會對手握兵權嘅功臣出手。早幾日阿史就講到齊景公「二桃殺三士」嘅故事，今次就講一講比較高招嘅「杯酒釋兵權」！
「杯酒釋兵權」呢件事發生喺宋朝建立初期，喺經歷過五代十國混戰之後，當時宋太祖趙匡胤避免類似澶州兵變和陳橋兵變等歷史劇重演，希望可以解除開國元老手中嘅兵權，從而達到中央集權嘅效果。佢諗盡方法，最終通過一場酒席做到呢件事！
有一日，趙匡胤聚集王公大臣石守信、高懷德、王審琦等人一齊飲酒，當佢飲到半醉嘅時候，佢就忽然愁眉苦臉，一眾大臣就問佢點解會咁。當時趙匡胤就回應指，自己如果冇咗咁多位大臣，應該都做唔成皇帝；但做成咗皇帝之後，反而冇晚好好訓過，仲不如去做個節度使好過。就咁聽到呢句說話，大臣們都大驚失色，石守信等將領跪下磕頭即時表明自己冇異心，而趙匡胤就趁機表明希望佢哋放棄兵權。
眾將聽到之後，都明白皇帝係咩意思，紛紛都表示會交出兵權，而冇幾耐趙匡胤亦都對呢班開國功臣進行封賞，等佢哋子孫後代都衣食無憂。就係咁樣，一場冇流血嘅酒宴就成功解決藩鎮權力過大嘅問題喇！
原圖嚟自網絡