尋日介紹過曹魏大司馬曹真為曹操曹丕曹叡三代打江山,但佢死後曹氏無乜出色人才,最終被司馬懿父子成功奪權,而呢個轉折位就係高平陵之變。

高平陵係三國時代魏明帝曹叡嘅陵園,曹叡係魏國第二任皇帝,係曹操個孫,曹丕個仔,死後葬响位於河南省汝陽縣內埠鄉茹店村嘅東南。响曹叡死後,年僅八歲嘅曹芳繼位,並由大將軍曹爽同太尉司馬懿輔政。當時曹爽就聽咗親信建議,晉升司馬懿為太傅而奪去了司馬懿軍權。曹爽又提拔夏侯玄為征西將軍,令魏曹軍政大權為曹氏同夏侯氏手中。曹爽專擅朝政,最終司馬懿就趁魏帝曹芳同曹爽等去高平陵謁陵時,發動兵變,控制咗京城,最終响高平陵之變控制咗曹芳同曹爽,接管咗曹爽軍權。後嚟更以謀反罪名將曹爽滅族。自此,司馬氏正式全面掌權曹魏政權,曹氏皇帝淪為司馬家嘅傀儡。

司馬懿死後,佢個仔司馬師權傾朝野,甚至已經有廢帝嘅打算,曹芳曾經聯合李豐、張緝、夏侯玄等人企圖罷除司馬師,但最後失敗咗,參與嘅大臣唔少仲慘被滅族。司馬師去世後,其弟司馬昭進位大將軍,廢咗曹芳另立曹髦為帝。後嚟曹髦見司馬昭完全唔尊重佢,於是又密謀殺司馬昭,不過司馬昭早就收到消息,結果曹髦被殺,司馬昭雖然再立曹奐為帝,但佢已經真正嘅魏國當權者。

响電視劇《新三國》嘅呢段,司馬懿就踩住曹爽教咗佢一個做人道理:「藏著。」當然!呢個係設計對白。