繼續同史友們介紹一啲中國嘅經典典故，喺形容有志之士勇於為知己而犧牲，好多時候都會用到「士為知己者死」嚟形容呢種行為，但史友們又知唔知歷史上到底邊位人物做出呢件事呢？
喺戰國時期，有位名為豫讓嘅俠客最初就為範、中行氏做大臣，之不過做咗一段時間都未得到重用。後來佢就轉投智伯並且好快就得到信任，之不過晉國被三分，智伯亦都被趙襄子殺害，趙襄子甚至仲用智伯嘅頭骨嚟做飲器。
曾經受過智伯知遇之恩嘅豫讓自然就氣難平，想方設法想幫智伯報仇。佢先係隱姓埋名假扮受過刑罰嘅人，去到趙襄子王宮洗廁所，打算喺廁所刺殺趙襄子，但點知呢條計謀就被識穿，佢亦都當場被捉住。之但係，當時趙襄子好欣賞佢為智伯報仇嘅行為，當場就放咗佢走。
豫讓報仇失敗，但就冇因為咁而放棄，反而就自毀容貌、以火炭改變自己聲音，令到自己由內到外都改變咗。佢選擇喺一條趙襄子必經之路埋伏，但呢一次因為殺氣太重又被識穿。趙襄子今次決定將佢處死，但豫讓就提出一個請求，希望可以畀佢刺王袍幾下以了心願。趙襄子答應咗呢個請求，豫讓刺穿王袍之後就自行了斷。呢個為知己而捨棄自己生命嘅故事，後世就稱之為「士為知己者死」喇！
原圖嚟自網絡