早幾日就同史友們介紹到「乾隆白菜」嘅起源，唔少史友都覺得呢類嘅典故好有趣，想阿史講多啲「有故事」嘅美食，咁就當然冇問題啦！今次阿史就大家介紹同朱元璋有關嘅「北京烤鴨」啦！

「北京烤鴨」今時今日嚟講當然係以北京最知名，但其實呢款美食本身就唔係北京本地嘅名食，反而係喺南京帶過嚟嘅！烤鴨呢種美食喺中國有好悠久嘅歷史，喺唐朝甚至仲發展出一套「籠燒鴨」嘅手法。呢款美食喺宋元得到傳承，而到咗南宋年間，烤鴨就成為臨安一種出名嘅美食，民間亦都有唔少出色嘅烤鴨師傅。

去到明初，定都南京嘅朱元璋就相當鍾意呢種美食，甚至仲有野史記載指佢日食烤鴨一隻，真係誇張！而得知朱元璋鍾意食烤鴨，唔少民間師傅同埋宮中禦廚都努力研製，因為朱元璋而令到烤鴨得出叉燒烤鴨、燜爐烤鴨兩種烤鴨做法，皇室嘅人都鍾意食！

咁好地地喺南京嘅烤鴨又點解會去咗北京呢？原來朱元璋四子明成祖朱棣喺搶咗朱允炆王位之後，為咗安心就先將都城搬到北京，喺遷都之時仲帶走唔少烤鴨師傅，令到呢種美食由南京去到北京、由皇宮再傳返出民間！

原圖嚟自網絡