尋晚沙田大圍發生咗宗嚴重交通意外，造成1人死多人受傷，但願呢次慘劇死亡人數數字唔好再增加。
過去香港都曾發生過幾次涉及巴士嘅重大意外事故，1986年11月5日早上，一架勝利二型九巴61A線行駛到屯門石排頭路時突然失事翻側，造成5死58傷。由於當時正值返學時間，傷者中部份係正趕返學嘅學生。而根據事後的調查所得，呢次意外係因為九巴勝利二型巴士响轉彎時車速過快，造成重心偏離，釀成翻側事故。而响1993年，另一宗九巴翻車意外又係响屯門發生，肇事巴士又係勝利二型，個次意外就造成40幾人受傷。