之前阿史都同史友們介紹咗一系列嘅古代酷刑，其中一種令唔少犯人聞風喪膽嘅刑罰就係凌遲處死。呢種被認為係人類歷史上最殘酷嘅死刑主要係針對叛國者，具體就係要由劊子手以利刀將受刑者身上嘅皮肉逐塊切走，如果受刑者過早死亡，劊子手就好有可能會受罰。既然呢種死刑咁講究，到底歷史上又可以行刑到幾耐呢？其中一個最聞名嘅案件就係明代宦官劉瑾。

劉瑾係明代中期、明武宗時期重要宦官，佢喺成化年間入宮，後來被調往東宮，深得太子寵信。當太子朱厚照即位後，劉瑾亦都得到重用，成為當時「八虎」之一，後來更被稱為明朝三大宦官之一。劉瑾當時權傾朝野，同其他宦官一齊令到皇帝玩物喪志，而自己就掌管東廠、西廠，打擊反對勢力，所以佢又被稱為朝堂之上嘅「站皇帝」。

之不過花無百日紅，去到正德五年（1510年）安化王朱寘鐇以討伐劉瑾為名，喺寧夏起兵叛亂。明武宗派楊一清起兵討伐，派宦官張永監軍，二人成功平亂並押送朱寘鐇回京。當時一心想除去劉瑾嘅楊一清成功拉攏到同劉瑾有矛盾嘅張永，密奏劉瑾謀反。結果，武宗派禁軍抄劉瑾家搜出黃金一千兩百零五萬兩，白銀兩億五千九百五十八萬兩。而當時六十歲嘅劉謹，就被依法被判凌遲3357刀處死，但就鄧之誠《骨董續記》卷二「寸磔」條云：「世俗言明代寸磔之刑，劉瑾四千二百刀，鄭鄤三千六百刀」，甚至仲傳出成個刑罰就持續足三日三夜，但係真係假就真係冇人知喇！

原圖嚟自網絡