繼續同史友們介紹香港各區嘅歷史建築,位於上水鄉門口村同埋中心村之間,有一座廖族最大嘅祠堂名為「廖萬石堂」。如果以為「廖萬石」係一個人物,咁大家就可能誤會咗喇!呢度真係講開有段故!

廖萬石堂建於清乾隆十六年(1751年),係傳統三間三進二院式建築,三進分別係前廳、過廳及後廳三部分,並且座落喺唔同高低嘅台基上,廳堂由兩個天井分隔。如果大家細心留意,應該仲會發現到門外建築仲設有照壁以防太陽直射祖先木主。最為特別嘅一點,由於《大清律例》平民係唔可以用到朱紅色大門,所以呢度就只係以紅粉石製成牆壁、再加上木雕簷板、正脊、斗拱雕刻、灰雕等裝飾,足以反映當年主人家係幾咁富有。

咁問題嚟喇,「廖萬石」又係點解呢?相傳廖氏遠祖廖剛同埋佢四個仔都先後喺北宋出任高官,每人俸祿各二千石,合一萬石。所以後人為咗紀念佢哋,就起咗呢座「廖萬石堂」喇!

原圖嚟自網絡