唔少攝影迷近年都好興去到一啲荒廢嘅地方進行攝影,喺過程中亦都令到唔少珍貴嘅文物重見天日。近日,喺深水埗北河街嘅一座廢棄丟空近40年嘅單位入面,就有一塊極為珍貴嘅手雕鳳凰木壁畫重見天日!

據喺附近嘅街坊接受傳媒訪問果陣表示,呢塊鳳凰木壁畫係喺茶樓開業之時由人手雕刻,至今已經有六十年歷史。茶樓外部今時今日已經被鐵鏈鎖住,但昔日其實係叫做「得喜」,街坊就回憶呢間茶樓嘢食唔錯、環境幾好,係唔少街坊嘅聚腳地。咁問題嚟喇,好地地一間茶樓因乜事唔再做呢?原來同一件悲劇有關!

茶樓之所以會荒廢,原來係喺1983年果陣,東主一家乘坐大韓航空007號班機從美國飛回韓國果陣被誤認係美國偵察機,結果就被蘇聯以飛彈擊中,機上269人包括乘客及機組人員全數罹難。當年有十四名港人死於呢次空難,東主一家就係其中之一。喺呢件不幸嘅事發生之後,茶樓隨即丟空,慢慢變成廢墟。

近年茶樓被政府收回,歷史悠久嘅鳳凰木壁畫亦被人寫上清拆字句,到底留唔留得住呢?就真係拭目以待喇!

原圖嚟自網絡