繼續同史友們介紹我國嘅國家級文物，青銅器相信大家都見過唔少，但到底一件點樣嘅工藝嘅青銅器，係會被稱為滇國代表作呢？今次阿史就同大家介紹下「吊人銅矛」啦！

「吊人銅矛」據考古發掘推斷係屬於戰國至西漢時期雲南滇池一帶嘅滇國，呢個古國一直都充滿神秘色彩，特別係佢出產嘅器物亦都充滿地方特色，當中就以兵器造型詭異凌厲而聞名。「吊人銅矛」全國只有兩支，顧名思義就係一支矛，但奇怪嘅係呢銅矛之上兩邊竟然有細鏈各吊一個全身赤裸嘅男子銅像。由銅像嘅雕刻嚟睇，兩個銅像男子都係雙臂被反綁，頭頸垂落，脊背彎曲，形象相當慘烈。

相信唔少睇到呢支銅矛外型嘅史友，都會估到其實呢支矛並唔係常規兵器，反而極有可能係用於祭祀或者其他重大活動，但具體用嚟做乜？考古學家都仲未答得到！

原圖嚟自網絡