「中國四大古橋」之一 廣濟橋

近排內地網絡就瘋傳一批影片，就係有唔少網民「野生捕捉」到謝霆鋒喺潮州嘅一個名勝古蹟拍攝節目，而其後謝霆鋒自己都發佈咗一則影片介紹呢度，呢個地方就係「中國四大古橋」之一廣濟橋喇！

位於潮州市東門外嘅廣濟橋，又叫做湘子橋，係古代閩粵交通要道，集拱橋、樑橋及浮橋於一體，係中國第一座啟閉式浮橋，真係相當犀利。呢座橋早喺南宋乾道七年（公元1171年）就建成，當時就只係一條由浮船組成嘅浮橋，名為康濟橋。由於呢條「橋」嘅使用頻繁，慢慢去到紹定元年（公元1228年）就建成咗一條有23墩嘅橋。

時間去到明宣德十年（公元1435年），當時嘅潮州知府王源主持大橋重修，喺橋上修築12座樓閣，並且將成條橋統一稱為「廣濟橋」。廣濟橋後來經過修築、減船等，形成「十八梭船廿四洲」。