相信史友們睇新聞都知道,一位活躍於澳門博彩業多年嘅商人被內地公安部門批准逮捕,之後澳門司警就好快請咗商人去飲咖啡協助調查。

用遠近馳名嚟形容澳門博彩業相信應該無乜人反對,而呢個第三產業更係澳門經濟命脈所在,甚至連香港唔少公司嘅業務都同澳門博彩業有關。但原來昔日澳門政府將博彩業合法化,係同香港大有關係。澳門博彩業可追溯至16世紀,响澳門開埠初期,成為歐洲部分國家响遠東嘅貿易商埠。貿易活動多咗,所以就吸引咗唔少澳門周邊地方嘅人到澳門打工,唔少人成為碼頭工人。就响建築工人、碼頭工人、傭僕等帶動下,澳門就出現好多賭坊,澳門博彩業就係咁樣萌芽。

後嚟香港島响1842年被割讓,英國人就响遠東地區有自己嘅貿易落腳點,澳門嘅貿易港地位漸漸被香港所取代。當時澳葡政府為咗振興經濟同埋增加稅收,於是就响1847年正式將澳門博彩業合法化,賭餉就成為咗澳葡政府主要收入來源,澳門呢個地方亦開始以博彩聞名。

原圖:大公報