相信唔少史友有留意到新聞應該都會睇到港鐵銅鑼灣站有列車甩車門嘅呢一幕,而歷史總係咁岩得咁橋,喺2007年嘅同一日,其實正正就係兩鐵合併嘅日子。
所謂嘅「兩鐵合併」,其實就係指香港地下鐵路(地鐵)及九廣鐵路(九鐵)車務運作正式合併,成個鐵路系統亦都正式改名為港鐵。咁到底點解會有呢段歷史呢?咁就要由1975年9月26日講起,當時港府就以全資擁有嘅方式成立咗地下鐵路公司;而另一個鐵路系統九廣鐵路嘅歷史其實係可以追溯到1910年,後來就喺1982年12月24日改組成政府全資擁有嘅九廣鐵路公司。
之不過由於兩鐵係分開管理,就鐵路發展同埋好多規劃都未必可以配合到,於是坊間就人提議政府將兩鐵合併,但呢個研究喺80年代就胎死腹中。時間再去到1999年6月,當時地下鐵路公司宣布改組為地鐵有限公司,並且喺2000年正式私有化。
於是港府亦都喺2000年嘗試邀請地鐵有限公司及九廣鐵路公司就《鐵路發展策略2000》規劃作出討論。只係喺會議上兩間公司喺沙中線嘅問題上都拎唔到共識,呢件事就被視為係兩鐵合併嘅起因。2004年2月,政府宣布邀請地鐵公司同埋九鐵公司就擬議合併一事開始進行商討。
去到2006年4月11日,政府就同地鐵公司達成兩鐵合併共識,行政會議亦通過兩鐵合併方案,喺2007年當年今日兩鐵就正式合併喇!
原圖嚟自網絡