喺未有太空影落地球嘅相之前,唔知大家又有冇幻想過地球會係點樣,但喺當年嘅今日之後,大家都親眼認識到我哋居住嘅星球係點樣喇!

喺1972年12月7日,美國嘅阿波羅17號太空船就喺甘迺迪太空中心發射升空,而當太空船運行到距離地球29,000公里嘅地方之後,喺背對太陽嘅情況下,太空人就以一部哈蘇(Hasselblad)相機拍攝出呢幅相當罕有、甚至被稱為係歷史上首度清晰拍下完整地球亮面嘅相片。就咁睇呢幅相,大家都會睇到照片當中就涵蓋由地中海地區去到南極洲冰冠嘅範圍,而當時南半球仲被好厚嘅雲層覆蓋,但成個非洲大陸就反而好清晰咁展現到出嚟。對當時身處太空嘅人而言,地球對佢哋嚟講就好似一粒小朋友玩嘅「藍色彈珠」,所以就以呢個名命名喇!

原圖嚟自網絡