1935年12月9日,中國近代史上發生咗一場著名嘅學生愛國運動,呢次事件亦成為全民抗日一個重要轉折,呢場就係「一二‧九運動」。
話說日本响1935年推動咗一個叫華北五省自治運動,佢哋搵班漢奸政客同一啲日本人控制嘅華人組織,要求華北五省脫離當時南京國民政府控制,呢個亦係日本發生全面侵華之前一啲陰謀。
當時華北地區好多中國人對日本嘅舉動好不滿,响11月,北平各大中學校學生代表成立「北平大中學校抗日救國學生聯合會」,搞咗幾場示威遊行抗議。到咗12月,呢個組織聽到消息話冀察政務委員會會喺9日成立,呢個會係一個順應華北自治而出現嘅行政組織,即係國民政府對日本作出妥協。北平學聯決定喺12月9日發動大規模嘅示威遊行,並且要求國民政府實現抗日。
不過,示威隊伍就俾軍警打,百幾個學生受傷,30幾人被捕。北平學聯決定全市學校响10日實行大罷課,以示不滿。北平市內都有好多人同情學生,一個星期後12月16日有成3、4萬人集會支持學生反日反政府,軍警又係武力鎮壓,造成400幾人受傷,最終導致全市罷課、罷工同罷市,國內其他城市都有聲援學生嘅集會同示威遊行。當局見到咁嘅情況,只好推遲冀察政務委員會成立。
一二九運動掀起全國抗日運動一個高潮,連東北軍主帥張學良都同情愛國學生,後嚟佢更通過「兵諫」逼使蔣介石抗日,亦即係西安事變。