南京失陷前軍民無得撤退？

呢幾日阿史介紹咗唔少1937年南京保衛戰同南京大屠殺嘅歷史，不過有樣嘢有位史友就問點解當時南京軍民唔撤退呢？

其實阿史好耐之前都講過，當時蔣介石雖然知道唔多夠日本打，特別係响淞滬會戰失利之後，中國軍隊受到重創，但南京作為當時首都，如果唔抵抗日軍侵略就講唔去。所以，蔣介石明知南京不可守，卻就高調表態要死守南京，結果唐生智就自告奮勇守護南京，獲任命為南京衛戍司令，而佢收到嘅指示，就係蔣介石提出嘅「誓與城市共存亡」。

亦因為咁，當時南京守軍就對長江邊作出封鎖，收繳渡江船隻，仲下令「擅自過江者以軍法從事」。按照唐生智嘅講法，就係「置之死地而後生」。但本來諗住守到日軍進攻一段時間，點知响個幾星期形勢就急轉直下，連蔣介石都漏夜離開南京。直到12月11日，蔣介石下達命令，叫唐生智下令南京守軍撤退，而唐生智响12月12日先正式下達撤退命令。但當時日軍已經兵臨城下，撤退過程非常混亂，部隊出現搶船渡江情況。最終只有少數部隊能成功撤退，大批軍民就留咗响南京。後嚟唐生智撤退到武漢後，就交代話原訂係12月14日有序撤退，但事與願違。