張仲景、華佗、董奉呢幾位歷史上著名嘅中醫史友們可能都聽過唔少，咁到底我哋現代又有冇出色嘅中醫呢？咁就當然有啦，阿史今次就同大家介紹下有「現代張仲景」、「中醫脊梁」之稱嘅李可老醫師！
李可出生喺1930年嘅一個小農商家庭，佢以16歲之齡從軍，亦都擔任過戰場記者，但就喺1953年果陣佢被誣告入獄，機緣巧合可以跟到獄中嘅一位老中醫學習《傷寒論》、《黃帝內經》及中醫醫理，到出獄之時佢就已經可以獨立開方睇病，甚至仲拎到中醫執照。
喺1963年，李可就開始佢嘅行醫生涯，由於求醫者病種複雜，佢唔單止要日頭診病，甚至晚上仲要蒐集簡便中醫治療法、練習針灸，嘗試搵可以幫到患者嘅有效方法。所以佢一生所學，就涉獵內、外、婦、兒、五官、皮膚等科。
咁到底點解李可會被稱為「現代張仲景」、「中醫脊梁」呢？原來佢唔單止首創中醫主理急症室及ICU，喺佢治療嘅十幾萬例重症患者當中，有兩萬幾例係被醫院放棄治療嘅絕症患者。佢自己更加依照中醫古籍而自創「破格救心湯」等方劑28首，以重劑治療重症及各類疑難雜症，真係令人敬佩！
原圖嚟自網絡