日軍响1941年入侵香港,令香港人陷入三年零八個月艱苦黑暗歲月,而响日治時期,軍政府响香港動作多多,甚至响香港興建「神社」。
當時日本軍政府响香港實行日本個套制度同措施,其中就將日本宗教信仰個套帶埋嚟香港。相信史友都聽過軍政府响寶雲山興建忠靈塔「供奉」戰死者,其實佢哋仲打算興建一個「神社」。呢個「神社」選址係响港督府後嘅兵頭花園(淪陷時易名為大正公園),取名為「香港神社」,供奉神道教主神天照大神,以及「供奉」日軍嘅戰死者。但隨住日本戰敗,「神社」未開檔就已經收檔,一個講法係話神仙起好但未對外開放,另一個講法就話未起好日本已經戰敗。
原圖:《日本侵華圖志》