每逢有咩大時大節,又或者想郊遊遠足,天壇大佛都係唔少港人嘅一個選擇,之不過史友們又知唔知呢座大佛係點樣嚟呢?喺當年今日,呢座全球第二大嘅戶外青銅坐佛就舉行開光大典!

要講呢座大佛嘅由來,就要由1974年講起。當時寶蓮禪寺就得到政府以象徵式嘅地價批出6,576平方米嘅木魚峰,並且將會喺呢個地方建造大佛。而喺1981年,寺方就正式成立「寶蓮寺籌建天壇大佛委員會」並且研究籌建工作。大佛嘅設計就係由廣州美術學院侯瑾輝負責製作石膏模型,並且不斷同負責大佛形象嘅藝術家商討,八次修改過大佛嘅形象。最終大佛嘅石膏模型就喺1986年9月26日運到南京,由中國航天南京晨光機器廠負責製造。

喺耗資超過6000萬港元之後,大佛最後一塊銅壁就喺1989年10月13日安裝完成,並且喺1993年12月29日舉行開光儀式,就係咁成為香港著名嘅旅遊景點之一喇!

原圖嚟自網絡